يوميات مدرسة و ...

قبل الحفل كان نشاط  بس كل الانشطه مخلصين أعمالهم يعني ما عندهم شي يزينونه فجلست مع شلتي اسولف ثمن رحت لنشاطي المصلى  تخيلوا ما لقيت الا  4 طالبات والمشرفة حقتنا جالسه تسولف برا طبعا إنا ادخل واطلع على كيفي عايشه جوي سولفت مع بنات المصلى ولعبنا كم لعبه للترفيه فقالت وحده احتمال اليوم ينزل برد ( الثلج الأبيض الدائري ) فقلت لا تزلقين ( أي لا تحلمين ) لان الجو كان شمس حر فقالت وحده ثانية  عادي تذكرين الفصل الأول كان الجو شمس زي كذا وطلعونا بدري لأنه جاء مطر .

رحت  للقاعة حقت الحفل وهو حفل افتتاح ملتقى البر ( المصلى ) فجلسوا معلمات النشاط يجهزون الأركان حقاتهم ويعدلونهن وآنا امشي وأتفرج احتريهم يوخرون ( يذهبون ويبتعدون ) عشان أصور طبعا إنا معروفه عندهم إني المصورة حقت المدرسة يعني كل ما صار فيه حفل ولا شي يبون يصورونه يطلبونن< < شفتوا الحركات هههههه.  بعد ما خلصت تصوير رحت لبست لبس الضيافة عشان أضيف المعلمات والإشراف إذا جو لما وصلوا كانت صديقتي برا عند الباب تعرفون ذيك الحركات حقات الوسادة وفوقه مقص ايوا هذي هي كانت ماسكتهن عشان المديرة تقص شريط الافتتاح اللي عند المدخل  << مسويين فيها كشخه ههههه. طبعا إنا كنت عند الباب من الداخل أرحب فيهم أعطيكم مثال على شكلي ذاك الوقت  تعرفون اليابانيين اللي يوقفون عند الأبواب  بالمحلات وبكل مكان إذا دخل شخص بيشتري يرحبون فيه ويقولون له " أوهايو قوزيمس أو شي زي كذا " بالضبط إنا كذا

بدت العروض وكل نفر جالس بكرسي << يعني مثلا وين تبينهم يجلسون فوق الطاولة ولا بالأرض . بدأ الحين شغلنا حنا الضيافة صبينا العصيرات للناس ودرنا بالحلا والفطاير والحلاو والقهوة أهم شي طبعا الإشراف أول ناس نبدأ نعطيهم كل ما نجيب لهم حلا ولا فطاير ما يدرون إلا الطبق الثاني بعده هم يبتسمون وباين انهم من جوا يقولون خلاص يكفي ما راح نقدر نأكل كل ذا أنا مايته ضحك عليهم وأجي أقولهم ما راح تطلعون من هنا الا وانتم سمينين فضحكوا بعدين لما خلص الحفل رحت وزعت باقة الورد وكل ما عطيت وحده ورده قامت تمدح

كل ما أجي عند وحده تأخذ ورده حمرا لما وصلت للمعلمات اللي ورا قالوا لي ما في حمرا جيت قلت لهم المرا الثانية بنحطهن كلهن حمر ههههه  أستاذة المصلى قالت لي الباقي حطيهن على مكتب المديرة تصدقون ما بقى إلا 3 ورود رحت لغرفة المديرة وكانت موجودة فقالت لي كم اخذ وحده قلت له اللي تبين وانا من جوا أقول وحده تكفيك ههههه ^o^  . بقى 2 أخذتهن لي رجعت للبيت والجو حر شمس عطيت وردتي الثانيه اخيتي فتون ورحت ادور شي بدرجي و لقيت دفتري حق الذكريات أيام الطفه لما كنت بزر هههه قلت خلين اجلس اقرأ واضحك عاد تصدقون كنت كشخه كنت احط  كل سطر بلون لا وبعد كنت ابدأ بكلمة " اليوم يوم جميل ...." عاد تخيلوا  الجو صار مطر وغيوم والشمس اختفت سبحان الله طبعا أمي تنادين تقولي تبين تروحين معنا ندور بالمطر إنا شي طبيعي بقول إيه  هم يحترونن بالسيارة وآنا جالسه ادور عبايتي عقدتي اخ بس وابوي يطنب بالبوري يعني بسرعة  من العجلة ما مدان البس نقابي فأخذته معي وغطيت وجهي بالطرحة فلما وصلت للسيارة بحمد الله لبسته

هذي صورتين من المطر

جلسنا نستريح ونصلي والبزارين راحوا يلعبون بالماء امونيه ( أختي كادي )  طاحت ( سقطة ) بالماء وبغت تغرق 7_7 من الهبلة أنا صنمت عجزت أتحرك و أبوي كان يكلم صديقه من الهبلة رمى جواله ولحق عليه وجابه ياربيه كانت كل ملابسه ماء بس الحمد لله ما صار له شي رجعنا للبيت وعلى طول رحت لسرير عشان أنام  -O-  وما قمت إلا الساعة 6

ويلا انـــيـــو في يوم أخر ^O^

يوم جميل مع المطر ^_*

يااااااااااااااااااااااااااااااااي من زمان ما دخلت << بس اني ما اشتقت

الجو اليوم خطنطر إنما إيه سبحانه دايم بعد الغبار مطر بما انه أول يوم بالدراسة فا شي طبيعي إن النوم ما انتظم جلست إلى 3 الليل وأحاول أنام وأنام لأني عارفه نفسي إذا ما نمت بصير مدري وشلون بس غش غش ما نمت زين كله من ساعة أختي على بالي بتوقف جلست استني لما طفشت منه قمت سكرته حظ أختي إني ما كسرته وارجع أنام وتجي أمي تقومنا وافتح جوالي وأشوف الساعة كم 6:5 وأقول تونا وارجع أنام طبعا أنا  ما أقوم إلا إذا جث الساعة 6:37 لما تجهزت وخلصت نزلت تحت ولبست العباية ويلا انطلاق < تستهبل على هالصبح , وصلت للمدرسة عاد وتبدأ السواليف مع شلتي < هذي شغلتنا لق لق لق , ما درسنا إلا الحصة الأولى بعد المفروض ما ندرس بس الشكوى لله بس تصدقون الجو كان جميل جداً جداً ما نعرف وحده اسمه miss شمس ههههههه جلسنا نسولف إلى نهاية الدوام المهم وأقول بنات فصلنا كذا : ( بنات تخيلوا وحده تنتحر من فوق السطح < متأثرة بالأفلام) , اللي يقول وناسه واللي يقول يمه يخوف واللي يقول بتجيه عقده نفسيه جت الطلعة وكل نفر راح لبيته إلا أنا وصديقتي هع هع هع مسكناه دوجه مين الغبي اللي بيفوت مثل هالجو ويلا نجلس ندور بالشارع والمطر كل ماله يقوى ( يزيد ) أم الوناسة والهوا باااااااااااااارد من شدة البرودة البعيد ما نشوفه وحنا نمشي تجي صديقتي تقول لي شوفي ذاك اللي هناك وأنا أناظر وين توقعوا وشو انه شي جميل خيل وراكب فوقه ولد عاد هنا حنا أم القهر نبي خيل طبعا حنا ما غير نقول غش غش نبي خيل مثله وش حيثه جالس يتمشى بالجو الزيين مع خيل صراحة أم القهر بس كان عايش جوه  طبعا بقولكم الجو وشلون كان بالتفصيل " الشمس ما شفناه ابد ابد تشوفين فوق كله غيوم والمطر ما شاء الله ما وقف وقوي والهوا قوي مرا وبارد والأرض كله ماء × ماء ومع تساقط المطر يطلع لهن أشكال دوائر ونقط والرعد قوي صديقتي انقزت ( نطت وقفزت << أحلا  ترجمه يا ناس ) علي من الخوف الجو يجنن يعني ببساطه مثل المسلسلات الكورية واليابانية إذا جاهم مطر  وفيه ضباب خفيف أقول لصديقتي تبين أجيب بكرا إن شاء الله مظله للاحتياط  < أنا عشت الجو " رجعت للبيت ولقيت استقبال من امونيه ( أختي كادي اصغر وحده ) وتركض وتخمن ( تحضنن ) < حسيت إني أصور مسلسل وأنا مدري هههههه , طبعا كانت عبايتي كله ماء وجزماتي ( وانتم بكرامه ) كله ماء حتى من جوا حسيت إني لابسه مسبح والمر يول بعد ماء حسيت إني سبحت دخلت البيت ولقيت أمي بالصالة قالت توكم تطلعون من المدرسة عاد أنا قمت استهبل  وأنا اضحك قلت لا نظراً لهذه الأجواء المفاجأة وتغير الطقس اضطريت لتأخير موعد العودة للبيت هي ما قالت شي بس  قالت حطي عباتس بالغسالة وعلى طول غيرت ملابسي من البرد وأقوم وأدور لي جكيت طبعا حنا  طلعنا ملابس الصيف من الدولاب ودخلنا ملابس الشتاء من زمان بس حظي إني ما دخلت جكيتي والبسه ثمن نزلت اتغدى ورحت نمت وما قمت إلا الساعة 6 المغرب فتحت اللاب وجلست اكتب وهذاي بروح أزين لي كابتشينو

الطريقه سهله وبسيطه تصلح للعجازين امثالي :_

(1)

(2)

(3)

(4)

ثمن جلست اتابع مسلسل بعدين تعشيت ورجعت اتابع واحتمال ينطفي الكهرب بأي وقت لان المطر و الرعد ما شاء الله ما توقفن  ابد مستمرات  بدون توقف وصوت الرعد  قوي ويخوف  بس انه شعور جميل بنفس الوقت

سؤال للمشاهدين << صدقت نفسه

كم مرآ قلت كلمة جميل ؟!